整容失敗之後（上）
望住鏡裡面嗰塊好似妖怪一樣嘅臉，我想喊，但連喊，隻眼都幾乎睜唔開。
鼻塌咗、嘴又歪咗、額頭有個坑、連下巴都硬晒。
我男朋友離我而去，但我無怪佢。
講真，如果我有得同其他人交換靈魂，我會即刻拋棄自己嘅軀殼。
連自己都唔想接受呢塊臉，點可能逼其他人去接受？
我本來只係想割個雙眼皮，喺醫生「建議」之下，愈整愈多，成塊臉都整過。
我變成呢個妖怪樣，醫生仲同我講「消咗腫就會好」。
我等啊等，終於有一日，我接受呢個現實：我整容失敗。
我搵嗰個整容醫生，但佢話我簽咗手術同意書，風險已經寫晒，告都告唔入。
於是，我加入咗一個整容維權群組，全部都係我呢種整容失敗，索償無門嘅女仔。
以前我以為，不幸嘅人，會得到其他人嘅同情。
我哋搞咗幾場公開活動，想引起公眾關注，但收到嘅，係更殘酷嘅評論。
「嘩，成堆女鬼，嚇死人。」
「食得咸魚抵得渴，整容就係有風險㗎啦。」
「鬼叫你哋貪靚，無啦啦整撻疤，唔抵可憐。」
我唔明，想靚係罪？
只要寫明晒風險，整容醫生嘅刻意誘導、唔負責任，就完全唔係問題？
我受到更大打擊，不過我無放棄。
我相信，唔負責任嘅醫生一定要得到應有懲罰，避免更多女仔受害。
但革命尚未成功，群組裡面已經陸續有幾個女仔，受唔住壓力而退出。
我逐個逐個打畀佢哋，花咗好耐時間，勸佢哋加入番，剩番一個女仔Betty，佢關咗fb，連電話都改埋。
好彩登記嗰陣，我有佢地址，我就去Betty樓下守候。
等咗兩日，都無見到Betty出嚟。
我哋呢啲整容失敗樣好易認，一係就成隻外星人咁，一係就戴口罩戴黑超遮到實。
直到第三日，我見到一個女仔，好靚，而佢著住Betty著過嘅裙，拎住Betty最鍾意嘅手袋。
「Betty？」我叫出聲。
個女仔下意識回頭，一望到我，就面色大變：「你認錯人啦。」
見到佢嘅反應，我知我一定冇認錯人。
我衝上去捉住Betty，連珠炮發咁問：「我知道你係Betty，你去邊度整番好塊臉？點解唔話畀我哋知？」
Betty見避唔過，唯有答：「我係搵咗個醫生，但代價好高......唔啱妳哋。」
「有咩唔啱？幾多錢我都肯畀。」我哋群組任何一個成員，都肯傾家蕩產去換番一塊正常嘅臉。
我不斷保證，唔會話畀其他成員知，Betty先講：「要帶一個正常樣嘅女仔去，愈靚愈好，嗰個女仔會毀容，你就會變番靚。」
我呆咗：「即係『換臉』？」
「可以咁講，但你唔會變到同佢100%一樣，只係將某啲健康組織換落你度。」
我諗咗好耐，亦做埋資料搜集，確定呢件事完全冇科學根據。
但一諗起Betty嘅靚樣，再望下自己嘅妖怪臉，我決定放手一搏，點都無可能比依加更差。
但係，我帶邊個女仔去換臉？點會有人肯毀容去幫我？
同埋要換臉，當然要搵個靚啲嘅女仔。
而Betty死都唔肯講佢帶咗邊個去，我相信佢都係用咗陰謀詭計。
我諗咗好耐，將目標放喺我個妹阿欣身上。
下集：https://bit.ly/3kN5Sde
幫恐龍做任務：https://goo.gl/Qoegsd
我聽到人哋講我壞話：http://bit.do/frcRd
#短故 #短篇 #小說 #陳美濤 #廣東話 #粵語 #tomatochan #整容失敗之後
Search